“Bir zərrənin işığına milyonlar şərik” deyib, özü də o şəriklərdən biri kimi yaşayan, lakin fərqli düşünən, yazıb-yaradan, xalqının yaddaşına əbədi həkk olunan Məmməd Araza.
Şair adlandırılanlarımız çoxdur, şair olanımız az. Şair olanların siyahısına düşmək böyük xoşbəxtlikdir. Dünyanın düzəlməməsindən, heç kimə mənsub olmamasından danışan, Vətəninin bir oğul kəlməsinə görə qayasında mamır olub bitməyə razı olan Məmməd Araz şair olanlardandır. Azərbaycan poeziyasının yükünü çiyinlərində gəzdirən dahidir Məmməd Araz. O, xalqın içindən çıxıb, xalqın şairi olub. Düşünərək, sevərək yazıb. Hər yazdığında bir məna, bir duyğu duyulur.
Məmməd Araz sözünün nə əvvəlinə, nə də axırına heç bir titul qoymadan şerlərini 100 ildən sonrakı nəslin qarşısına qoysan o dəqiqə - dahidir, xalq sənətkarıdır, ən əsası, böyük şairdir – deyərlər. Məmməd Arazın qəlbi də yaratdığı poeziya nümunələri kimi genişdir, pakdır, ədalətlidir.
Dahi şairimiz vətənini sevir. Vətənində yaşayan hər bir soydaşı da ona böyük məhəbbət və ehtiramla yanaşır. Çünki Məmməd Araz şairdir. Şair olmaq isə çox çətindir. Hər bir sözün, hər bir misran nizamlanmalıdır. Adicə bir səhv fikir şairliyin dəyərini alçaltmaq gücünə malikdir. Daim yüksəkdə olmaq, şair kimi tanınmaq az-az sənətkarlarımıza nəsib olub ki, onlardan biri də Məmməd Arazdır.   
Şair kimi dünyaya gəldiyi günü qeyd edirik Məmməd Arazın. O, şair kimi doğuldu, Vətəninə bir Tanrı sovqatı oldu. Bu sovqatı qəbul edib Məmməd Araz yaradıcılığına qiymət verməyi bacaran hər bir kəs onu təbrik edir. Ad gününüz mübarək olsun, Məmməd Araz! Ruhunuz əvvəlki tək təmiz, yazıb-yaratmaq həvəsiniz tükənməz olsun!