Hələ ilk şerlərindən oxucuların qəlbinə yol tapan Məmməd Araz bu gün xalqın sevimlisinə çevrilmişdir. Məhəbbət öz-özünə gəlmir, məhəbbət qazanılır. Nə ilə? Məhəbbət elə bir duyğudur ki, onu yalnız və yalnız məhəbbətin özü ilə qazanmaq olar. Sevməyən sevilə bilməz. M. Araz şairliyindən əvvəl alovlu bir vətəndaş kimi Vətəninin vurğunudur. Onun qazandığı el məhəbbətinin də mayası, cövhəri  Vətəninə, elinə bu vurğunluğunun bəhrəsidir. Buna görə də mən onun şerlərini qeyrət və məhəbbət nəğmələri adlandırardım.
Sevdiyinə görə sevilən şairimizin 50 yaşı tamam olub. 50 yaş sənətkar üçün yetkinlik dövrüdür. Lakin bu, onun hələ yaradıcılıq zirvəsi deyil. Xalq ondan bu zirvəni gözləyir. Çünki qəlbində hələ deyilməmiş nəğmələr çoxdur. Indiyədək elədikləri onun gələcək yaradıcılıq zirvəsindən xəbər verir.
Qələm yoldaşımın 50 yaşını təbrik etdiyimiz bu gündə biz ona gözlədiyimiz zirvəni arzulayırıq.