İLHAMSIZ
Çək gətir günəşi yastığın elə, Tök gətir yaxana düz ulduzları. Sıxaq dan yerinin qızartısını, Silək günbatanın işartısını, Sənin tamahına qulluqçu olaq, Sənin iştahana buyruqçu olaq; Çayları yükləyib çəkək qapına, Selləri yükləyib tökək qapına, Dağları döndərək qızıl qalağa, Dizinə söykəyək qızıl aftafa. Bütün meşələrin yarpağı daş-qaş, Bütün ağacların bəhrəsi daş-qaş; - Yığ sovur, səpələ belədən-belə; Döy, qovur, səpələ belədən-belə. Mən şərik çıxmaram dünyana sənin, Nura bük, ya bələ dumana, sənin... Bunların hamısı yaxşıdan əla, Əladan yaxşıdır, səncə, eləmi? Bunların heç biri çıxarmaz yola Cındır ilhamınla paslı qələmi. Mən bir göy, Bir sarı yarpaq istərəm, Gözümü doyuram son anımacan; Götürəm payıma düşən dünyanı Bəzəyəm sonuncu gümanımacan. 20 oktyabr, 1979
|
|