İTLƏR
İtlər qar üstündə həvirləşirlər,
İtlər oynaqlayır, süpürləşirlər.
Gəmirir, dişləyir biri-birini,
İtcə nəşələnir, itcə sevinir,
Bu onu, o bunu bulayır qara...
Elə bil həsədlə baxıb onlara,
Hardansa sümsünə-sümsünə
bir
Boz tula gəlir.
İtlər duruxurlar,
itlər baxırlar.
Onu imsiləyir, bunu iyləyir,
Sanki it dilində nə isə deyir,
Sonra hürə-hürə hasarı aşır.
İtlər mırıldaşır,
İtlər tutaşır...
İtlər bir-birini az qalır didə,
Uşaqlar tökülüb harayçı olur.
İtlər qovulur,
ancaq
Çox nahaq
İtlər inandılar üçüncü itə.
Yanvar, dekabr 1968
|
|
