YURDUMUZUN QIZLARI
(Nəğmə)
Zəhmətiniz üz ağlığı,
Yurdumuzun gül qızları.
Başımızın ucalığı,
Bəxtimizin ulduzları.
Nur daşıyar bu ağ yollar,
Bələdçisi mərd oğullar.
Təbəssümlər “uğur” -- deyər.
“Məni səslə, çağır” -- deyər...
Ön sırada gedənlərin
Qismətinə alqış düşər.
Qəhrəmanlar nəfəsindən
Qayalara naxış düşər.
Bir saz kimi çalaq Kürü,
Bu düzlərə nəğmə qoşaq.
Ağ işıqlı Mil-Muğanda
Gül qızlara nəğmə qoşaq.
İyul, 1973
|
